- Әдебиет
- 14 Наурыз, 2013
Ана атану – әйел бақыты
Менің мамандығым – бухгалтер. Жеті баланың анасымын. Мен үшін биылғы жылдың ерекше оқиғасы – Елбасымен кездесуіміз.
7-наурыз күні Ақорданың «Алтын залындағы» Елбасымен кездесуіміз бір сағаттан артық уақытқа созылды. Кездесу алдында қатты қобалжығаным да рас. Елбасының өзі кіріп келгеннен кейін бұл сезімнің барлығы тез басыла қалды. Дәстүрге айналған бұл кездесу «Көктем шуағы» деп аталады. Кездесуге қатысқандар арасында басшылық қызметтерде, әскери міндеттерде, өнерде, білімде, бизнесте, денсаулық сақтауда, спортта және өмірдің т.б. салаларында биік жетістіктерге қол жеткізіп жүрген жандар болды. Кездесу барысында ұрпақ тәрбиесіне үлкен көңіл бөліп, көп балалы ана атанған әйелдерге деген құрмет Елбасы тарапынан айрықша көрініп тұрды. Мемлекет басшысы еліміздегі сегіз миллионнан астам әйелдерді, қыздар мен келіншектерді осы 8-наурыз мерекесімен шын жүректен құттықтап, отбасылық бақыт, береке және табыстар тілейтінін жеткізді.
Кездесу еркін әңгіме түрінде өтті. Елбасының қабылдауында болудың өзі мен үшін үлкен бақыт, үлкен қуаныш. Нұрсұлтан Назарбаевтың өз қолынан «Алтын алқа» белгісін алдым. Елбасының сөйлеген сөзінен үлкен әсер алдық. Оның әйел туралы айтқан сөздерінің бірі: «Ең әдемі әйел – өмірге көп бала әкелген әйел».
Ұлтқа, ұрпаққа тәрбие беретін әйел болғандықтан олар мықты болуы керек деп ойлаймын. Қыз-келіншектерге айтатыным, ештеңеден қорықпау керек. Қызмет қуу, ол жерде қандай да бір дәрежеге көтерілу деген қай кезде де бола береді. Дәл қазіргі шақта қазағымыздың ұрпағын көбейту басты міндет болып отыр.
Қазіргі кезде тұрмыс құрып, кейін тірліктің қиюын келтіре алмай, қайтадан ажырасып кетіп жатқан отбасылар көптеп кездеседі. Адамдар алуан түрлі болады ғой. Бұл жерде де әйел адамның рөлі басым болатын шығар. Ең бастысы жұбайлар арасындағы түсінісу, махаббат, сыйластық деген сезімдер болуы шарт. Егер осының бәрі болатын болса, ажырасу, ұрыс-керіс деген сияқты келеңсіз жағдайлар мүлде орын алмайды деп ойлаймын. Айналып келгенде, мұндай қасиеттердің түп-тамыры отбасында алған жақсы тәрбиеде жатыр.
Бүкіл Қазақстан халқын келе жатқан Наурыз мерекесімен құттықтаймын. Барлық қыз-келіншектерге айтарым: Көп балалы болудан қашпаңыздар. Алла тағала беріп тұрса, жағдайларыңыз келіп тұрса, дүниеге нәресте әкеле беріңіздер. Қиындықтан қашпаңыздар. Қазақтың саны көбейе берсін. Жұртымыз аман, еліміз тыныш болсын. Қазақ әйелдерінің денсаулығы мықты болсын.
Астана
8548 рет
көрсетілді2
пікір