- Ақпарат
- 29 Сәуір, 2010
Келісім мекені – Қазақстан
Өткен сейсенбі мен сәрсенбіде Алматыдағы «Интерконтиненталь – Алматы» қонақүйінде дәстүрлі ІХ Еуразиялық медиафорум болып өтті. Онда адамзатты толғандырып отырған сан түрлі тақырыптар, Батыс пен Шығысқа тел мәселелер әлемнің БАҚ өкілдері мен белді саяси тұлғалары тарапынан талқыға түсті. Әуелгі күні форум беташарын Елбасы Нұрсұлтан Әбішұлы Назарбаев ашты. Ол жиылған көпшілікті осымен тоғызыншы рет өткізіліп отырған пікіралмасу мерекесі ашылуымен құттықтай келіп, салиқалы, сындарлы мұндай сұхбат орнының Қазақстанда қалыптасуы кездейсоқ емес екендігін атап өтті. – Батыс пен Шығысты тоғыстыратын қазақ жері бүгінде бейбітшілік белдеуіне айналды. Өркениетті үнқатысудың өзіндік моделі орныққан Қазақ елінде әлемдік діндер мен дәстүрлі конфессиялардың 3-құрылтайы өтті. Татулықты ту еткен еліміз дүниежүзіне ізгіліктің өнегесі болуда. Қазақстан ТМД мемлекеттері арасында тұңғыш рет Еуропадағы Қауіпсіздік және ынтымақтастық ұйымына төрағалық етуде. Халқымызда бағзыдан жеткен «Жол – жүрсе, өнеді» деген даналық сөз бар. Жолдың өнуі үшін нақты қадам керек. Бүгінде жаһандық БАҚ-тың назары Қазақстан мен Орталық Азияға ауып тұр. Небәрі 18 жыл бұрын біздің өңір әлемге беймәлім шет аймақ еді. Ал қазір Орталық Азия – әлемдік экономика, қауіпсіздіктің аймақтық және жаһандық жүйесінің аса маңызды бөлігі, – деді Мемлекет басшысы. Мұнан кейін сөз тізгіні Еуразиялық медиафорумның ұйымдастыру комитетінің төрайымы Дариға Назарбаеваға тиді. – Біз тоғызыншы рет осы арада бас қосып отырмыз. Мақсат – артта қалған бір жылға көз салып, ғаламдық БАҚ-та көрініс тапқан қайшылықты құбылыстар мен оқиғаларды түсінуге талпыну, – деп және бір серпілісті ұмтылыстың бетін ашты ұйымдастыру комитеті төрайымы. Оның айтуынша, әркез өткенді ұғынып, болашақ оқиғаларды болжамдау әрі оларды толық дайындықпен қарсы алу, ылғи да оңай бола бермейді. Өйткені біздің ғаламды болжап-білу қиын болып барады. Әрине, басқосудың алғы сөзінде айтылған бұл сөздер кейінгі талқылардың бүкіл барысына әсер етті деуге болады. Себебі әрбір сөз алушы спикер өз лебізінде сонда айтылған ой-пікірлерге сілтеме жасап отырды. Осы орайда бір айта кетерлігі, биылғы конференция жұмысына өзгертулер енгізілді. Шараға қатысам деушілер санының көбеюіне байланысты биыл қатысушыларды тіркеу ақылы болды. Бұл туралы ЕМФ Бас директоры Руслан Жамков алдын ала хабарлаған болатын. Айтса айтқандай-ақ, аталмыш шараның сапалы өткендігін оған қатысқан өте белгілі медиасарапшылар, ғалымдар, саясаткерлер, журналистер мен кәсіпкерлердің мол шоғырынан білуге болады. Жалпы, екі күнге жалғасқан форумда «Қазақстанның ЕҚЫҰ-ға төрағалығы: маңызы, үміт және мүмкіндіктер», «Белгісіз Иран», «Үрей індеті», «Ғаламтор аумағын реттеу және тәуелсіз БАҚ: үрей мен шындық», «Әлеуметтік желілердің дамуы феномені және «еркін» журналистиканың ерекшеліктері», «Саяси имидж мәселесі: Шоу жалғасуда ма?» тақырыптарында пленарлық мәжілістер өтті. Абылайхан ҚАЛНАЗАР
2550 рет
көрсетілді0
пікір