- Тіл
- 21 Қазан, 2010
Есеп беру міндеті ескерілсе...
Тілдерді қолдану мен дамытудың 2011-2020 жылдарға арналған Мемлекеттік бағдарламасының жобасы туралы менің пікірлерім мен ұсыныстарым мынадай:Мемлекеттік тілдің басымдылығын көрсету мақсатында Бағдарламаның атауы «Қазақстан Республикасындағы мемлекеттік тілді және өзге тілдерді қолдану мен дамытудың 2011-2020 жылдарға арналған бағдарламасы» деп жазылуы керек. Бағдарламаның орындалуын қадағалаушы орган Президентке тікелей бағынатын немесе Парламент жанынан құрылған, жоғары өкілеттігі бар қоғамдық орган болуы қажет. Бағдарламаны іске асырушылар қатарында тек министрліктер емес, меншік нысанына қарамастан, еліміздегі барлық кәсіпорындар мен мекемелер, ұйымдар, кәсіпкерлік нысандар да болуы керек. Жобада: «Бағдарламаның басты мақсаты – «Қазақстанда тұратын барлық этностар тілдерінің сақталуы жағдайында…» деген сөздер бар. Бағдарлама бүкіл еліміз үшін міндетті, ал кейбір әкімшілік аумақтарда, мысалы, аудандарда, бұл талапты орындау мүмкін емес. Мысалы, біздің ауданда оннан астам ұлттардың өкілдері 1-ден 11-ге дейін адамды құрайды. Олардың тілдерін сақтау үшін аудан не істей алады? Сондықтан, Жобадағы жоғарыда келтірілген сөздерді не алып тастау керек немесе «…жергілікті этностар өкілдерінің өз тілдерін сақтауына бағытталған өтініштері мен бастамаларына Үкімет қолдау көрсетеді» деген мазмұнда жазылуы керек. Конституциямыздың 7-бабында да: «Мемлекет Қазақстан халқының тілдерін үйрену мен дамыту үшін жағдай туғызуға қамқорлық жасайды», – деп жазылған. Президентіміздің «…барша қазақстандықтарды біріктірудің басты факторы болып табылатын қазақ тілінің…» – деген сөзі бар. Ал Жобаның «Бағдарламаның басты мақсаты» деген бөлігінде: «…ұлт бірлігін нығайтудың маңызды факторы» деп жазылған. «Басты» мен «маңызды» деген сөздердің мазмұнындағы айырмашылық үлкен. Сондықтан жоғарыдағы сөйлемде «басты фактор» деген анықтауыш сөз тіркесін қолданған дұрыс. Президентіміздің жоғарыда келтірілген сөздеріне сүйенсек, барша қазақстандықтарды біріктіретін қазақ тілі – ұлтаралық қатынас тілі болуға сұранып тұр емес пе?! Ал бізде қазіргі тілдік ахуалды олай деп айтуға мүлде келмейді. Тіпті мемлекеттік қызметшілердің 45 пайызы ғана қазақ тілінде жаза алады деген ақпарат бар. Олай болса, Бағдарламаға «мемлекеттік тіл ұлтаралық қатынас тілі қызметін атқаратын дәрежеге жетуі тиіс» деген қағида енгізілуі керек. 1997 жылы қабылданған «Тіл туралы» Заңда Үкіметке: «…Мемлекеттік тілді белгілі бір көлемде…білуі қажет кәсіптердің, мамандықтардың және лауазымдардың тізбесін жасақтау» туралы тапсырма болған еді, белгісіз себептермен ол тапсырма орындалмай келеді. Ал Жобада бұл туралы сөз жоқ. Үкіметтің іс-шаралар жобасын Бағдарлама жобасымен бірге дайындап, талқылауға ұсыну керек еді. Кейінірек іс-шаралар жобасы да халықтың талқылауына ұсынылады деп ойлаймын. Себебі Бағдарламаның іске асырылуы осы құжатқа толықтай тәуелді болмақ. Жобада айтылғандай, тіл мәселесіне байланысты «…еліміздегі қоғамдық-саяси ахуалдың тұрақтылығына елеулі кауіп-қатер әкелуі мүмкін бірқатар проблемалық аспектілердің болуы…» Бағдарламаға және оның басты орындаушысы Үкіметке жүктелетін жауапкершіліктің қаншалықты үлкен және маңызды екенін айқындай түседі. Сол себепті Бағдарламада әрбір жылда атқарылатын жұмыстар нақты көрсетілуі тиіс әрі Үкімет Бағдарламаның орындалу барысы туралы әр жылдың басында Президент пен Парламентке толыққанды есеп беріп отырсын. Жалпы, Мемлекеттік тіл мәселесін түбегейлі шешу үшін Конституциямыздың 7-бабына «Қазақстан Республикасының азаматы мемлекеттік тілді білуге міндетті» деген талап жазылуы керек. Самиғолла Ғалымұлы Атырау облысы
2637 рет
көрсетілді0
пікір