- Тіл
- 27 Қазан, 2010
«Алтын қазық» оқу-кешені өмірге келді
Мәдениет министрлігі Тіл комитетінің Ш.Шаяхметов атындағы Тілдерді үйлестіру-әдістемелік орталығының ұйытқы болуымен «Тіл үйрету орталықтары қызметкерлерінің біліктілігін жетілдіру» атты республикалық ғылыми-практикалық конференция өтті. Конференция жұмысын ашып сөз сөйлеген аталмыш орталықтың басшысы Біржан Белғараның айтуынша, конференция барысында көтерілген – «Тілдерді қолдану мен дамытудың 2011-2020 жылдарға арналған мемлекеттік бағдарламасы» іске қосылса, алдағы жылы орталықтың жұмысын ұйымдастыру, үйлестіру, іс-шаралар жоспарын анықтау және тағы басқа өзекті мәселелер қаралады деп күтілуде. Ал Мәдениет министрлігі Тіл комитетінің төрағасы Бауыржан Омаров «2011-2020 жылдарға арналған мемлекеттік бағдарлама» жобасындағы мақсаттардың алғашқысы Қазақстан халқына қазақ тілін үйретуді міндеттейтінін атап, орталықтарды біліктілік сынақтарынан өткізу жүйесін құру мәселесіне және жиынның күн тәртібіндегі мәселелерге тоқталды. – Осы уақытта тілді дамытуға қатысты мемлекеттік бағдарламаның жобасы жасалып, Үкіметке ұсынылды. Онда тілді оқыту мен оқу әдістемелерін және тіл оқытатын орталықтарды жетілдіруге арналған ұсыныстар мен жаңашылдық идеялар жеткілікті. Сонымен қатар тілді оқытудың үздіксіз жүйесін жасау, сынақ, біліктілік орталықтарын құру, тіл үйрету орталықтарын аккредитациядан өткізу сияқты бірқатар жаңалықтар да бар. Мұның барлығы жергілікті жерлерде өткен талқылауларда жиі айтылды және көбінесе қолдау тапты. Бұл жаңалықтардың барлығы біздің тіл үйрету бағытындағы жұмыстарды жаңаша жолға қояды деген үміттенемін, – дейді Тіл комитетінің төрағасы. Бұл күні конференция барысында шетелдердегі қазақ диаспорасына қазақ тілін оқытуға арналған «Алтын қазық» оқу-әдістемелік кешенінің тұсауы кесілді. «Алтын қазық» оқу-кешені халықаралық озық тіл үйрету тәжірибелері негізінде әзірленіпті. Ол бастауыш, жалғастырушы, жоғары деңгейге арналған 3 негізгі оқулық пен 3 жұмыс дәптерінен және электронды оқу құралынан, дидактикалық-иллюстрациялық материалдар жинағынан тұрады. Оқу құралына сырттағы қандастарымыздың тілін сындырумен қатар салт-дәстүр, тұрмыс-тіршілік, ұлттық тәрбиеге қатысты материалдар енгізілген. Мемлекеттік тіл үйрету курстарының жұмысын жандандыру, тілді үйретудің әдіс-тәсілдерін жетілдіру мақсатында ұйымдастырылған жиынға облыстық тіл үйрету орталықтарының директорлары, Астана қаласындағы мекемелердің тіл мамандары мен ғалымдар қатысып, мемлекеттік тілдің маңызы, тілдерді үйрету орталығының негізгі қызметтері туралы түрлі ой-пікірлерімен алмасты. Бейбітгүл Әбдіғаппарқызы
3051 рет
көрсетілді0
пікір