- Руханият
- 09 Желтоқсан, 2021
Кенжалинді ұлықтаған шара
Кеше Қазақстан Республикасы Тәуелсіздігінің 30 жылдығына орай әл-Фараби атындағы Қазақ ұлттық университеті журналистика факультетінің ЮНЕСКО, халықаралық журналистика және қоғамдық медиа кафедрасы мен «Қазақ газеттері» Жауапкершілігі шектеулі серіктестігінің ұйымдастыруымен ІІ Жұмабек Кенжалин оқулары аясында «Қазақстан қоғамындағы ақпараттық үдерістер: тәуелсіздік тынысы» атты Республикалық ғылыми-тәжірибелік конференция болып өтті.
Шараны журналистика факультетінің деканы Мадиев Сансызбай Шарапиұлы ашып, ҚР Президентінің БАҚ саласындағы сыйлығының және Қазақстан Журналистер одағы сыйлығының лауреаты, Қазақстан Журналистер академиясының академигі, Қазақстан Республикасының мәдениет қайраткері Жұмабек Кенжалиннің ел мұраты жолындағы қызметіне тоқталды.
Алматы қаласы әкімінің кеңесшісі Мамай Ахет өз естелігінде Жұмабек Омарұлының еліміздің тәуелсіздікті алғаш алған жылдарында Алматы қаласының ономастика комиссиясының мүшесі болып, ұлтымыздың танымал тұлғаларының есімдерін жаңғыртуға белсене араласқанын атап өтті.
«Ақиқат» журналының бас редакторы Дәуіржан Төлебай Жұмабек Кенжалиннің қазақ тілінде тұңғыш рет «Экономика» атты салалық газетті шығарғанын ерекше бағалау керек екенін айтты.
Конференция қонағы техника ғылымдарының докторы, профессор Бақдәулет Құмар адал достың үндемей жүріп ордалы шешімдердің түйінін шешетін әрі нағыз тыңғылықты істің үлгісі болғанын үлкен толғаныспен жеткізді.
Одан кейін техника ғылымдарының кандидаты Есенбек Айдарбеков, жазушы Сәбит Дүйсенбиев пен Ж.Кенжалиннің жары Әлима Кенжалина сөз алып, қайраткер қаламгердің журналистика мен ғылымға сіңірген еңбектерін айтып, шараны ұйымдастырушыларға алғыс білдірді.
Жұмабек Кенжалиннің ұлы Дастан Кенжалин де сөз алып, әкесінің қазақ журналистикасында елдік мұрат жолында жасаған еңбегінің жоғары бағаланып, жас ұрпақтың жадында қалар шараның ұйымдастырылып жатқанын ерекше атап өтті.
Орынтай Ошанова
1216 рет
көрсетілді0
пікір