- Руханият
- 13 Қазан, 2022
ҚАЗАҚҚА КЕРЕК БЕС ТОМДЫҚ
«Ана тілі» газетінің тұңғыш Бас редакторы, зерттеуші-журналист Жарылқап Бейсенбайұлының 5 томдық шығармалар жинағы жарық көрді. Көптомдыққа қаламгердің ең үздік деген туындылары енген.
Алғашқы томда өткен ғасырдың жетпісінші-сексенінші жылдары оқырман қауым жылы қабылдаған әлемдік бейнелеу өнері тарихындағы Жаңаша дәуірдің ұлы шеберлері мен қазақтың саңлақ суреткерлері жайындағы эсселер шоғыры жинақталған «Буырқанған бояулар», сондай-ақ ұлтымыздың озық әдеп-дәстүрлері мен халықаралық этикет ережелері сабақтастырыла қарастырылған «Әдеп әлемі» кітаптары қайта өңделіп, толықтырылып берілген. Автордың тарих көші, баба жұрттар ізімен шетелдерге барған жолсапар жазбалары да осы томда кеңінен қамтылған.
Екінші томды көп жылдар бойы Шоқан Уәлихановтың өмірін зерделеп, ұлы ғалымның 1856 жылы жасаған Ыстықкөлге сапарының ізін қайталай жүріп өткен, ол еңбек етіп, ғұмыр кешкен мекендерде арнайы болған қаламы қарымды жазушының жаңа ғылыми, мұрағаттық құжаттармен байытылған, көлемі 743 беттік «Шоқан» тарихи-ғұмырнамалақ роман-эссе кітабы құрайды.
Үшінші томға автордың «Қазақ шежіресі»», «Арғы түріктер ақиқаты ізімен» атты еңбектері, «Шоқан Уәлиханов – ауыз әдебиеті мен ортағасырлық жазба мұралар зерттеушісі» және Жошы ұлысының әйгілі бектербегі, қазақтың этнотектік тарихында елеулі орны бар «Нағанай би» ғылыми зерттеулері енген.
Төртінші томға қаламгер ғалымның Халықаралық Түркі академиясының жобасы бойынша «Қазіргі түркология» сериясымен 2015 жылы елордадағы «Ғылым» баспасынан жарық көрген «Орталық Азиядағы арғы түрік сипатты мәдениеттер: этнотектік аспектілер» атты ауқымды монографиясының өңделіп, толықтырылған соңғы нұсқасы да басылған.
Бесінші томға ұлтымыздың ұлы тұлғалары мен баспасөз саласының көрнекті өкілдеріне қатысты эсселері, өзі қызмет еткен ақпарат құралдары туралы мақалалары, берген сұхбаттары, кітаптары мен зерттеулеріне қатысты рецензиялар, автор туралы лебіздер, аудармалары топтастырылған.
Жұлдыз ӘБІЛ
907 рет
көрсетілді0
пікір