- Руханият
- 02 Наурыз, 2012
Қазақ әнінің «Ақ маңдайлысы»
ҚР Ұлттық кітапханасында «Інжу-маржан» атты өнер клубы құрылды. Клубтың негізгі мақсаты – қазақ өнерін насихаттау, өнер қайраткерлерімен кездесулер, дөңгелек үстелдер өткізіп, шығармашылық байланыстар орнату. Клубтың алғашқы отырысы КСРО-ның және Қазақстанның халық артисі, Халық Қаһарманы Роза Тәжібайқызы Бағланованың 90 жылдығына арналды. Оған белгілі әнші, Қазақстанның халық артисі Мақпал Жүнісова, ақын Шөмішбай Сариев, әнші Біржан Хасанғалиев, «Тарлан» тобы және Роза Бағланованың жақындары, отбасы мүшелері қатысты. Роза Бағланованың өнегелі өмірі, қайталанбас дауысы, мейірімді жүзі халқының жүрегінде әрдайым сақталары сөзсіз. Ол көзінің тірісінде сырлы да сазды әндерді нақышына келтіре орындап, тек қана әншілігімен емес, сонымен қатар ерекше адамгершілігімен, Отанына деген шексіз сүйіспеншілігімен тыңдармандарының алғысына бөленген жан еді. Роза Бағланова әншілік өнердің ғажайып құбылысына айналды. Кездесуге келген өнер қайраткерлері, әйгілі өнер иесінің қасында жүріп, қызметтес, әріптес болған іні-қарындастары өздерінің естеліктерін айтып, жезтаңдай әншінің өмірінен сыр шертті. Ақын Шөмішбай Сариев әнші туралы өз ойларын ортаға салып, «Алтын дауыс» атты өлеңін оқыса, әнші Мақпал Жүнісова өзінің әнші жайлы естеліктерімен бөлісіп, Роза Бағланованың репертуарындағы «Сәулем-ай», «Еркем-ай» атты әндерін тамылжыта шырқады. Жас әншілер Біржан Хасанғалиев пен «Тарлан» тобының жігіттері де Роза Бағланованың орындауында халық арасында кең тараған «Әдемі-ау», «Іңкәрім-ай» әндерін тарту етті. Осы шараға орай «Ғасыр әншісі» атты кітап көрмесі ұйымдастырылды. Онда танымал әншінің өмірі мен шығармашылығына арналған 150-ден аса әдебиеттер ұсынылған. Дәуіржан Төлебаев
3715 рет
көрсетілді0
пікір