- Әдебиет
- 05 Шілде, 2012
«Үшқоңыр – Алатаудың қойнауында...»
Мен Елбасы Нұрсұлтан Әбішұлы Назарбаевтың кіндік қаны тамған құтты мекені – бұрынғы Шамалғанды өз көзіммен көрсем деп армандаушы едім. Ақыры сол арманыма да жеткендеймін.Алматы қаласының іргесіндегі Үшқоңыр ауылына келіп жеттім. Қазақстан Президентінің балалық шағы өткен жерді, Үшқоңырдың тауы мен тасын аралап жүріп өзімді бақытты жандай сезіндім. Бұрынғы Үшқоңыр – бүгінде үлкен ауыл. Жасыл желекті Үшқоңыр ауылы адамдарының өзіндік өмір тіршілігі бар. Үшқоңырдағы Қарасай орта мектебі «Бізде Елбасы оқыған» деп асқақ үн қататындай. Мектеп ішін аралап шыққан соң, бір кездері Нұрсұлтан Әбішұлы оқыған Абай атындағы мектепке маңдай тіредім. Мектеп бүгінде тарихи-өлкетану мұражайына айналған. Мұражай алаңына неше түрлі гүлдер отырғызылған. Айнала жасыл желекке тұнып тұр. Мұражайда Елбасының өміріне байланысты құнды деректер, мағлұматтар көп екен. Елбасының партасы, қаламсабы... Сондай-ақ бозбала шағынан бүгінгі өміріне дейін сыр шертетін екі мыңға жуық суреттер ілінген. Елбасының сыныптастары, ұстаздары, отбасы мүшелері бейнеленген суреттер жүрекке жылылық құяды. Нұрсұлтан Әбішұлына алғаш қалам ұстатып, әліппенің қыр-сырын ұғындырып, білімге алғаш талпындырған ұстазы Тәкура Алғадайқызының суреті де көзге оттай басылады. Ол бала Нұрсұлтанды алғаш білімге жетелеген ұстаз. Қандай мақтаныш! Міне, мектеп бітірген жылы сыныптастарымен түскен сурет. Топ ішінде аққұба өңді, маңдайы кере қарыс балғын жігіт тұр. Нұрсұлтан Әбішұлының отты жанарына қарап білімге құштар, алдына қойған мақсатынан таймайтын, өр мінезді жігіттің бейнесі көз алдымда тұра қалды. Мектепте оқып жүргенде-ақ, жаңашылдыққа талпынып, сыныптастарының көшбасшысы болған Нұрсұлтанның жарқын бейнесі әлі күнге дейін ауылдастарының есінде. Елбасының анасы Әлжан апаны құшақтай түскен суреті қандай тартымды. Суреттегі Әлжан апаның аққұба жүзі мен ойлы тұнық көздеріне, кең маңдайына қарап тұрып: «Неткен ұқсастық! Осындай даналық қасиеттер анасынан дарыған-ау, сірә. Әлжан апай, шынында, аналардың асылы екен ғой. Даралық та, даналық та анасының ақ сүтінен дарыған екен ғой» деп ой түйдім. Сонда менің есіме Елбасының туыс әпкесі Шара Қатубаеваның: «Әлжан жеңешеміз адамзаттың асылы еді. Сол даралық, даналық қасиет Нұрсұлтанға анасы Әлжан апайдан дарыса керек» деген сөздері түсті. Үшқоңыр десе жан дүниесі бөлек, елін, жерін шын жүрегімен сүйген Елбасының туып-өскен жерімен қауышқаныма өзімді бақытты жан сезіндім. Бүгінде Үшқоңырдан шыққан қарапайым ауыл баласы Нұрсұлтан қазақтың басын құрап, төрткүл әлемге әйгілі Мемлекет басшысы болды. Бұл да Үшқоңырдың тұрғындары үшін үлкен мәртебе. Келерімде меймандос ауыл Үшқоңыр ізет көрсетіп қарсы алса, кетерімде алыстан мұнартып қала берді. Жол бойы менің көз алдымнан қазақтың абыройын асқақтатып Қазақстанды асқарлы асуларға бастаған біздің ең сүйікті Елбасымыздың жарқын бейнесі кетпей қойды. Елбасының анасы мен әкесіне жүрегім елжіреп: «Бізге осындай парасатты ақыл-ойдың иесі Нұрсұлтандай кең маңдайлы Елбасын дүниеге әкелгендеріңіз үшін сіздерге көп рақмет. Үшқоңырдай асыл топыраққа да мың мәрте тағзым» деп іштей қайталай бердім. Бақыт Бұланбаева, мұғалім Павлодар облысы Ақсу қаласы
4935 рет
көрсетілді0
пікір