• Тіл
• 02 Тамыз, 2012

Масылдық кеселінен арылуға болады

«Ана тілі» газетінің №29 санында «Масылдық кеселінен қалай арылуға болады?» деген мақала жарық көрді. Осы мақаладағы айтылған пікірлерді қолдау мақсатында өз ойымды ортаға салсам деп едім. Масылдық – бұл адам баласын орға жығатын жағымсыз қасиеттердің бірі деп білемін. Масылдық кеселіне шалдыққан адам одан тез арада арыла алмайтын болса, ол өзінің өмірін дұрыс ұйымдастыра алмайды. Үнемі біреуге қол созып, көмек сұраумен өтеді. Дені сау бола тұра, жұмыс істегісі келмейтін, адал еңбекке аяқ басқысы келмейтін азаматтарды аз көріп жүрген жоқпыз. Соларға қарап тұрып, кейде ойлаймын, бұлар біздің мемлекетке, қоғамға қандай пайда келтіреді деп. Менің ойымша, масылдық кеселінен арылтатын тура жол – бұл маңдай теріңді сылып тастап еткен еңбегің. Бұдан өзге жол жоқ. Өйткені еңбек қана адамды шыңдайды, тәрбиелейді. Өзіміз бала жас­тан еңбекпен өстік. Одан жаман болғамыз жоқ. Қайта еңбек бізді өмірдегі қиыншылықтарды жеңуге, еңсеруге тәрбиеледі. Белді бекем буып, әрбір іске жауапкершілікпен қарауды үйретті. Біз еңбегімізге адал болу арқылы, оның да жемісін көріп келеміз. Еңбекке төгілген тер, еңбекке қарай жасалған қадам далаға кетпейді. Ол әрбір адамның өзіне ырыс пен байлық болып қайтып келеді. «Еңбек етсең ерінбей, тояды қарның тіленбей» деп Абай атамыз айтқандай, еңбек адамы ғана ешкімге көзін сүзбей, өз күнін өзі көреді. Масылдықтың туындау себептерін, сондай-ақ адамның жеке психологиясымен байланыстыруға болады. Табиғатынан еріншектікке бейім тұратын адам масылдыққа тез үйір болады. Ондай адам масылдыққа бой ұру арқылы өз бойындағы еріншектік қасиеттерді байқатпауға, жасырып қалуға тырысады. Бұл тұрғыдан алғанда масылдықты ешқандай себептермен ақтап алуға келмейді. Зада Аманбаев Шығыс Қазақстан облысы