- Тіл
- 22 Желтоқсан, 2012
Қазақ кітаптарының бағасы неге қымбат?
«Ана тілі» газетінің биылғы №43 санында Рая Ахметқазықызының «Қазақ әдеби тілі» сөздігінің таралымы неге аз?» деген мақаласы жарық көрді. Автордың «мұндай сөздіктер әр қазақтың шаңырағында тұрса да артық болмас еді» деген сөзімен келісе отырып, төмендегі жайтты айтқым келеді. Орал қаласында Қазақстанда басылып шыққан кітаптарды сататын жалғыз дүкен бар (Жәңгірхан атындағы дүкен), сонда жаңағы сөздік бос тұр (таралымы аз болса да). Неге? Ол сөздіктің әрбір томы 4500 теңге тұрады. Алған кісі бір томын, не екі томын алмайды ғой, алса бәрін алу керек. Бұл сөздіктердің толық жинағы 15 томды құрайды. Сонда бағасы 67500 болып шығады. Оны кім сатып ала алады, қазақ тілінен сабақ беретін мұғалім бе? Әлде жай қазақ отбасы ма? Ал Ресейде шығып, жаңағы дүкенде сатылатын орыс тілінің сөздігі (С.И.Ожеговтің) 1500 теңге тұрады. В.Дальдің үлкен форматтағы бір томдық сөздігінің бағасы 1000 теңге, бұларды кез келген зейнеткер сатып ала алады. Мысалы, жаңағы сөздіктің бір томы 1000 теңге болса, мен оларды әлдеқашан сатып алған болар едім, зейнеткер болсам да. Жалғыз сөздіктер емес, Қазақстанда шыққан кітаптардың тек таралымы ғана аз емес, сонымен бірге бағасы қымбат, жай халық сатып алып оқи алмайды, соңғы жылдары кітапқа деген ықыластың азаюының бір себебі осында. Жыл он екі айда мемлекетімізде неше түрлі тойлар, форум-конгрестер көптеп өтіп жатады. Оларға кетіп жатқан көптеген миллиондарды ойланбастан жұмсап жатыр. Ал ана тілімізге келгенде қолын жайған көшедегі тіленшіміз! Халқымыздың тарихы, мәдениеті, салт-дәстүрі, тілі туралы кітаптарды қарапайым халықтың қолына жететіндей таралыммен көбейтіп, бағасын арзандату керек. Оған мемлекет субсидия бөлуі керек деп есептеймін. Ж.Жонайтегі, еңбек ардагері Орал
2853 рет
көрсетілді0
пікір