- Тіл
- 09 Желтоқсан, 2010
Ономастика тұғыры – ұлттық мүдде
Конференцияға ҚР Мәдениет министрлігі Тіл комитетінің қызметкерлері, облыстық, қалалық Тілдерді дамыту басқармаларының бастықтары, басқармалардың ономастикаға жауапты мамандары, ономастика саласын зерттеп жүрген ғалымдар, Алматы облысының аудан, қала әкімдері, аудандық, қалалық ішкі саясат, мәдениет және Тілдерді дамыту бөлімдерінің бастықтары, республикалық, облыстық, қалалық газеттердің бас редакторлары, зиялы қауым өкілдері қатысты.Талдықорған қаласында Қазақстан Республикасы Мәдениет министрлігінің Тіл комитеті мен Алматы облысы әкімдігінің ұйымдастыруымен «Қазақ ономастикасы: басым бағыттар мен үлгілі үрдістер» атты халықаралық ғылыми-теориялық конференция болып өтті.
Конференцияда Алматы облысының әкімі Серік Үмбетов құттықтау сөз сөйлеп, облыстың бүгінгі әлеуметтік-экономикалық жағдайын тілге тиек етті. Әсіресе, тіл мәселесіне арнайы тоқталды. ҚР Мәдениет министрлігі Тіл комитетінің төрағасы Бауыржан Омаров күн тәртібіндегі мәселе бойынша баяндама жасады. Ол тіл саясаты және ономастикадағы ұлттық мүдде жөнінде сөз қозғады. Пленарлық отырыста ҚР Парламенті Мәжілісінің депутаты Алдан Смайыл «Ономастика тұғыры – ұлттық мүдде» тақырыбында баяндама жасады. А.Байтұрсынұлы атындағы Тіл білімі институтының директоры, филология ғылымдарының докторы, профессор Шерубай Құрманбайұлы баяндамасында тілдік проблемаға, қазақтың аты-жөнін дұрыс жазу мәселесіне назар аударды. Л.Гумилев атындағы Еуразия ұлттық университеті әлеуметтік ғылымдар факультетінің деканы, тарих ғылымдарының докторы, профессор Зиябек Қабылдинов «Республикамызда ономастикалық жағдайдағы негізгі механизмді дамыту» тақырыбында маңызды мәселе қозғады. Осы университеттің жалпы тіл білімі кафедрасының профессоры, филология ғылымдарының кандидаты Гүлнар Көлдеева ономастикадағы педагогикалық ерекшеліктер жөнінде айтты. Шетелден келген қонақтар да өз пікірлерін ортаға салды. Көршілес қырғыз елінен келген академик Абдылдажан Ақматалиев «Ономастикадағы жаңа Манас есімі» атты тақырыпта сөз сөйледі. Түркиялық Шабан Айдоғдының «Анадолыдағы жер атаулары» атты баяндамасы да өзектілігімен ерекшеленді. Облыс орталығындағы Тіл сарайында секция жұмысының екінші кезеңі өз жалғасын тапты. Секция «Ұлттық ономастика жүйесін зерттеудің негізгі аспектілері» тақырыбында өтті. А.Байтұрсынұлы атындағы Тіл білімі институтының директоры Шерубай Құрманбайұлы секцияны жүргізді. ҚР Үкіметі жанындағы мемлекеттік ономастика комиссиясының «Ономастикалық хабаршы» бюллетенінің бас редакторы Сабыржан Шүкірұлы «Ономастика және ұлттық сана тәрбиесі», С.Аманжолов атындағы Шығыс Қазақстан университетінің доценті, филология ғылымдарының кандидаты Бердібек Бияров «Шығыс Қазақстан топоним жүйесін реттеу жолдары» атты тақырыптарда баяндама жасады. ҚР Білім және ғылым министрлігі География институтының аға ғылыми қызметкері Сламқұл Әбдірахмановтың «Қазақстан топонимикасының мемлекеттік каталогы мен картасын әзірлеу барысындағы мәселелер» баяндамасы мазмұндылығымен құнды болды. «Ақиқат» журналының бас редакторы, филология ғылымдарының кандидаты Мұхит Салқынбаевтың «Жер-су атауларына ұлттық келбет керек», М.Әуезов атындағы әдебиет және өнер институты директорының орынбасары Ақжігіт Әлібекұлының «Көне түркі жазуларындағы жер-су атаулары» деген тақырыпта жасаған баяндамалары сәтті шықты. Қырғыз Республикасы Ғылым академиясы Ш.Айтматов атындағы Тіл және әдебиет институтының аға ғылыми қызметкері Малина Қасымгелдиева және т.б. ғалымдар баяндама жасады. Тарих ғылымдарының докторы Зиябек Қабылдинов жетекшілік еткен екінші секцияда да баяндамалар жасалып, пікір алмасылды. Облыстық тіл басқармасының бастықтары сөз сөйледі. ҚР Мәдениет министрлігі Тіл комитетінің төрағасы Бауыржан Омаров конференция жұмысын қорытындылады. Конференцияда көтерген мәселелер бойынша қарар қабылданды (Аталған конференция жөніндегі материал газетіміздің келесі нөмірінде жарияланады). Нұрлан ҚҰМАР
3876 рет
көрсетілді0
пікір