- Ақпарат
- 12 Қыркүйек, 2012
Алматы – ән ажары
Жыл сайын Алматы күні қарсаңында ұйымдастырылатын «Алматы жүрегімде – 2012» ән байқауы биыл да жарияланған еді. Жеңімпаздар мен қатысушылар бағалы сыйлықтармен, Құрмет дипломдарымен марапатталады. Ал конкурстың бас жүлдесі – автокөлік. Қатысуға ниетті өнерпаздар CD форматында жазылған ән немесе концерттік орындаудағы аудио, сонымен қатар орындалатын әннің мәтіні мен орындаушының фотосуретін Мәдениет басқармасына 25 тамызға дейін жіберіп үлгерген-ді. Алматы қаласының мәдениет басқармасы мамандарының хабарлауынша, оңтүстік астана туралы үздік әнге жарияланған байқау қыркүйек айының 14-і, яғни ертең қала күні мерекесі аясында Қазақстан Республикасының Тұңғыш Президенті атындағы саябақта өтеді. Бұрын жарияланбаған мемлекеттік, орыс және ағылшын тілдерінде шырқалатын Алматы туралы ән байқауына халықаралық, ұлттық деңгейдегі байқаулар мен фестивальдарға қатысып, тәжірибе жинақтаған 18 бен 30-дың арасындағы жас эстрада әншілері қатыстырылады. Сондай-ақ байқауға ұсынылған ән міндетті түрде «тірі» дауыспен айтылады. Өткен жылы мұндай байқаудың бас жүлдесі «Аяла» тобына берілген болатын. «Алматы жүрегімде – 2012» атты ән байқауы дарынды жас композиторлар мен орындаушыларды қолдау үшін, туған қалаға деген сүйіспеншілік пен патриоттық сезімді тәрбиелеу және Алматының мәдени орталық ретіндегі имиджін қолдау мақсатында, осыған қоса композиторларды шабыттандыру үшін қолға алынып отыр» дейді ұйымдастырушылар. Қара қылды қақ жаратын қазылар алқасының құрамында Халық артистері мен елге танымал өнер зерттеушілері бар. Олардың саны оннан асып жығылады. Қатысушылардың өнері 10 балдық жүйемен есептеледі. Өткен жылғы байқау барысында қызды-қыздымен қала әкімі ән шырқап жіберген болатын. Биылғы жарыстың да тосын сыйлықтар мен күтпеген қызықтарға кенелтетіні хақ. Қала күніне орай тағы бір шара 16 қыркүйек күні 20.00-де Орталық стадионда болады. «ALMA DANCE» деп аталатын музыкалық концертке Қазақстан эстрадасының жұлдыздары қатысады. Белгілі орындаушылар алматылықтар мен қала қонақтарына өздерінің үздік әндерін тарту етеді. Сахнада «Орда», КешьЮ», «Buhar Jerreau», «Сhick Fick», «Индиго», «Асыл» топтары мен қазақстандық Луина, Нұржан Керменбаев және итальяндық әнші Сон Паскаль ән шырқамақ. Осы күнгі, яғни 16 қыркүйектегі тағы бір жаңалық веложарыс өтеді. Ол Олимпиада чемпионы Александр Винокуров пен Алматы қаласының әкімі Ахметжан Есімовтың қатысуымен өтпек. Соңынан жарысқа қатысушыларды марапаттау және мерекелік концерт болады. Нұрлан ҚҰМАР
2690 рет
көрсетілді0
пікір