• Ақпарат
• 29 Қараша, 2012

«Әнжұмбақта» – Исраил Сапарбай әндері

«Қазақстан» ұлттық арнасында «Әнжұмбақ» бағдарламасының жаңа маусымы көрермендерге тосын сыймен жол тартты. Жаңа маусымның жаңалығы – бел­гілі композиторлар Ш.Қалдаяқов, Е.Хасанғалиев, Н.Тілендиев, С.Бәйтереков, ақындар М.Мақатаев, Б.Тәжібаев сынды қазақ өнерінде ерекше қолтаңбалары бар адамдардың әндеріне арналған бағдарламалар көрсетіледі. Сонымен қатар ана, туған жер, табиғат, халық әндері, кинофильмдер де бағдарламаның бас­ты тақырыптары болмақ. Жұбаныш Жексенұлының ән сынағынан өтуге радиожүр­гі­зушілер де өз ұсыныстарын біл­діруде. Думанды доданы алғашқы болып Нұржан Еркінұлы бастап келсе, қарсы топта Рүстем Жүніс өз отбасымен келуді жөн көріпті. Нұржанның тобында тележүргізушілер Асхат ­Садырбай мен Нұрмахан Мұқанұлы келіп, өз әріптесіне қолдау көрсетті. Жігіт­тер ақын Исраил Сапарбайдың әндерінен емтихан тапсырды. Алғашқы айналымда көрермен­дер жасырған әндер Рүстемнің тобын алға шығарды. Ал вокалды-аспапты «Достар» тобының жасырған әндері Нұржанның тобының қоржынына жоғары ұпай алып келді. Төртінші айналымда әнші Таңат Мамырханның жасырған әнін біліп, Исраил ағамыздың «Қазақ қызы», «Өзің ғана», «Жұлдызым», «Махаббат мәңгі ертегі», «Сағындым сені», «Бір тамшы көздің жасындай» сияқты әсем әндерін тыңдағыларыңыз келсе, Ұлттық арнада бүгін сағат 15.20-да болатын «Әнжұмбақ» бағдарламасын тамашалаңыздар. Б.Мұратқызы