• Тарих
• 29 Қараша, 2012

Туған елдей ел қайда...

Алматыдағы «Қазжол» қонақүйінің Алтын адам залында «Жас-Ай» медицина орталығының жанынан құрылған «Ел-Шуақ» қоғамдық қоры мен «Қазақ радиосында» «Бауырластар» бағдарламасының ашылуына байланыс­ты тұсаукесер рәсімі өтті.  Шараның ашылу салтана­тын­да «Жас-Ай» медицина ор­та­лы­ғының бас директоры, медицина ғылымдары­ның докторы, профессор, академик, халықаралық ­«Сократ» атындағы орденнің иегері Жасан Зекейұлы сөз сөйледі. Ол Қазақстанда жаңадан ашылған қоғамдық қор мен бағдарламаға байланысты құттықтау сөзін жеткізді. ҚР еңбек сіңірген қайраткері, филология ғылымдарының докторы, М.Әуезов атындағы Әдебиет және өнер институтының директоры Уәлихан Қалижан жаңадан құрылған қор мен бағдарламаға жүрекжарды лебізін білдірді. Одан кейін ақын Алмас Ахметбек қордың жұмысына қатысты өз пікірін айтты. «Қазақ газеттері» ЖШС-ның Бас директоры – Редактор­лар кеңесінің төрағасы Жұмабек Кенжалин жаңадан құрылған қоғам­дық қордың жұмысына сәттілік тілеп, ақиық ақын М.Мақатаевтың кітабын сыйға тартты. «Қазақ радиосының» басшысы Махат Садық «Бауырластар» бағдарламасының ашылуының түпкі негізін түсіндірді. Сонымен қатар ол алдағы уақытта қандас­тары­мыз­ға арналған телесериалды түсіру жоспарда бар екенді­гінен көпшілікті хабардар етті. Шығыстанушы ғалым Ислам Жеменей, Алматы қаласы сауда-өнеркә­сіп палатасының төрағасы Мұхтархан Бияров, ақын, Халықаралық «Алаш» сыйлығының иегері Жәркен Бөдеш және тағы басқалар қоғамдық қор­дың болашағының жарқын болуына өз тілектерін білдірді. Ал «Қа­зақтану» қоғамдық қорының пре­зиденті Баян Ахметқызы «оралман» деген сөзді алдағы уақытта «бауырлас­тар» деп атау туралы ұсыныс білдірді. Сонымен қатар ол өз зейнетақысына «Дүние-толқын» газетін айы­на 1 рет шыға­рып отырғандығын, басылым жалпы оралмандарға арналғандығын айтты. Кештің соңында елімізге белгілі күй­ші, сазгер Шәміл Әбілтаев өзі шығарған ән мен күйін нақышына келтіріп орындады. «Ел-Шуақ» қоғамдық қорының негізгі мақсаты – еліміздің эко­номикалық, әлеу­мет­тік және саяси дамуына белсене үлес қо­су, өнер және мәдениет өкілдеріне қолдау кө­р­се­ту, түрлі мәдени шараларға атсалысу, же­тім­дер үйін, мүгедектерді, ардагерлерді қам­қорлыққа алу. Ал «Бауырластар» атты бағ­дарлама үстіміздегі жылдың мамыр айынан бастап тыңдармандарға ұсынып келеді.