- Ақпарат
- 29 Қараша, 2012
«Халықаралық кеңістіктегі қазақ графикасы»
Кеше Астанада Мәдениет және ақпарат министрлігінің Тіл комитеті Тілдерді дамыту мен қолданудың 2011-2020 жылдарға арналған мемлекеттік бағдарламасын іске асыру жөніндегі 2011-2013 жылдарға арналған іс-шаралар жоспарына сәйкес ономастика саласына қатысты мәселелерді жетілдіру мақсатында «Халықаралық кеңістіктегі қазақ графикасы» атты ғылыми-практикалық конференция өткізді. А.Байтұрсынұлы әліпбиінің 100 жылдығына орайластырылған конференцияға ҚР Үкіметінің жанындағы Мемлекеттік ономастика комиссиясының мүшелері, белгілі ғалымдармен қатар облыстық тілдерді дамыту басқармаларының бастықтары, жоғары оқу орындарының профессор-оқытушылар құрамы мен БАҚ өкілдері қатысты. «Адамзат ақыл ойының озық үлгілерін ортақ пайдалануға бүгінгі жаһандық үдерістерден шет қалмай, солардың бел ортасында болуы бұл орайда тіл мен жазу мәселесі аса маңызды орынды иеленді. Сондықтан қазақ тілінің өзіндік болмысын сақтай отырып, халықаралық кеңістікте қамтамасыз етуге икемді қазақ графикасын дайындап,оны бүкіл қоғам талқысына сала отырып бекіту – еліміз үшін маңызды мәселе» дейді Тіл комитеті төрағасының орынбасары, филология ғылымдарының докторы, профессор Ш.Құрманбайұлы. Бұл орайда қазақ графикасын түркі халықтары арасында қолданылатын ортақ әліпбимен қазақ графикасының сабақтастығы, сәйкестігі де ескерілуге тиіс. Іс-шарада ҚР Үкіметінің жанындағы Мемлекеттік ономастика комиссиясы мүшелерінің, ономастика саласы ғалымдарының, жоғары оқу орындарының профессор-оқытушылар құрамы өкілдерінің аталған тақырыпқа байланысты өзекті баяндамалары тыңдалып, ономастика, қазақ графикасы саласындағы мамандардың пікірлері мен ұсыныстары назарға алынды. Конференция қорытындысы бойынша арнайы жинақ шығарылмақшы. *** Тіл комитетінің ұйымдастыруымен Астанадағы «Ұлттық тестілеу орталығында» қазақ тілі оқытушылары мен әдіскерлерінің біліктілігін арттыруға арналған республикалық семинар өтті. Біліктілікті арттырудың семинары барысында әдістеме бойынша шеберлік сабақтары өткізіліп, әдістеме негізінде әзірленген оқулықтар, әдістемелік құралдардың құрылымы мен мазмұны таныстырылды және оларды қазақ тілін оқытуда пайдаланудың ерекшеліктері түсіндірілді. Айта кетейік, дәл осындай семинарлар бұған дейін еліміздің төрт өңірінде ұйымдастырылды. Жалпы семинарларға республика бойынша 200-ден аса мемлекеттік тілді оқытудың өңірлік орталықтарының оқытушылары мен әдіскерлері, облыстық, қалалық тілдерді дамыту басқармаларының сарапшылары қатысты. Семинарлар нәтижесінде біліктілікті арттырудың сертификаттары табысталды. Б.Исаева
3178 рет
көрсетілді0
пікір