• Ақпарат
• 29 Қараша, 2012

Әкімдерге міндеттер жүктеді

Кеше Мемлекет басшысы Нұрсұлтан Назарбаевтың төрағалығымен өңірлерді дамыту жөнінде кеңес өтті. Кеңеске барлық деңгейдегі әкімдер, Үкімет мүшелері, құқық қорғау органдарының өкілдері, бірқатар мемлекеттік органдардың басшылары қатысты. Жиында Мемлекет басшысы Нұрсұлтан Назарбаев: «Сіздер әлемде не болып жатқанын көріп отырсыздар. Бұл – дағдарыстың жаңа толқыны емес, әлемдік экономика әлі шыға қоймаған 2007-2008 жылдардағы дағдарыстың жалғасы. Біз барлық қиыншылыққа қарамастан, өмір сүру деңгейін үнемі көтеріп келеміз» деді. Осы орайда бүкіл әлемді елеңдеткен дағдарыстың салдары әлеуетті мемлекеттерге де қиын тиіп отырғанын айтты. Ал біздің еліміз мұндай қиындықтарға қарамастан, халықтың тұрмысы көтеріліп келе жатқандығына тоқталды. Елімізде 550-ден астам индустриялық нысан іске қосылып, 100 мыңға жуық тұрақты жұмыс орындары ашылған. Халықтың жан басына шаққанда нақты орташа кірісі артты. «Мұндай табысқа қол жеткізген елдер қазір әлемде көп емес. Осының барлығы мемлекеттің дұрыс саясаты, халқымыздың еңбекқорлығы, бекем бірлігінің, мемлекеттік қызметкерлердің жүйелі жұмысының нәтижесі деп білемін» деді Мемлекет басшысы. Сондай-ақ Елбасы жиынға қатысқан әкімдерге өңірлердегі кәсіпорындардың бәсекеге қабілеттілігіне баса назар аудару керектігін тапсырды. Егер елімізге келетін импорт көлемі арта беретін болса, облыстардағы индустрияландыру дамы­май­тындығын ескерте келе, осы мәселе қатаң бақылауда болуы керектігіне мән берді. Қазіргі шақта еліміз білек түріп бар әлеммен бәсекеге түскелі тұр. Сондықтан отандық өнімді қатаң бақылауда ұстау қажет. Берілген тапсырмаларға жауапкершілікпен қарап, тиісті деңгейде атқару қажеттігін қадап айтты. «Біздің мойнымызға еліміздің тағдыры мен оның болашағы үшін тарихи жауапкершілік жүктелген. Біз қарапайым азаматтардың игілігі үшін мемлекеттік аппарат пен «Нұр Отан» басқарушы партиясының барлық ресурсын жұмылдыруымыз қажет. Сондықтан да мен биылғы жылдың басындағы өз Жолдауымда айтқанымдай, реформаның жаңа кезеңіне кірістік» деп атап өтті Елбасы. Исатай ҚОРҒАНБАЕВ