- Мәдениет
- 07 Желтоқсан, 2012
Көңіл күймен асқақтап...
Алматыда Қазақтың мемлекеттік Құрманғазы атындағы академиялық халық аспаптары оркестрінің залында Қазақстан Республикасының Тұңғыш Президенті күні мерекесіне арналған мерекелік концерт болып өтті. «Құрманғазы атындағы оркестр нағыз халық оркестрі атанып кеткен. Ахмет Жұбанов негізін қалаған оркестр бүгінгі күні әлемге әйгілі. Жастардың өнерін шыңдау, кәсіби шеберлігін дамыту біздің басты мақсатымыз» дейді Қазақстанның еңбек сіңірген қайраткері, «Құрмет» орденінің иегері, Қазақтың мемлекеттік Құрманғазы атындағы академиялық халық аспаптары оркестрін 20 жыл бойы басқарып келе жатқан Еркебұлан Мүсіреп. Концерттік бағдарламаны Ахмет Жұбановтың «Қазақ маршымен» ашқан оркестр бірден тыңдармандарын баурап алды. Кеш барысында Тәттімбеттің «Көкейтесті», «Қос басар», Н.Тілендиевтің «Атадан мұра», Құрманғазының «Байжұма», «Серпер», «Терісқақпай», «Сарыарқа», Түркештің «Көңіл ашар», Ықыластың «Айрауықтың ащы күйі», Қ.Ахмедияровтың «Күй ұраны», халық күйі «Ақсақ құлан» және тағы басқа шығармалар асқан шеберлікпен орындалды. Сондай-ақ Қазақстанның еңбек сіңірген артисі, Мемлекеттік сыйлықтың иегері Шахимардан Әбіловтің орындауындағы әндер де көпшіліктің көңілінен шықты. Сонымен қатар шеберлік сабақтарын өткізуге келген мәскеулік өнер иесі А.Цыганков та шәкірттерінің концертіне қонақ болып қатысты. Ақын Марфуға Айтқожина өлеңдерін оқып, оркестрге өзінің ризашылығын білдірді. Кеш соңы Құрманғазының «Сарыарқа» күйімен аяқталып, өнердегі талантты жастарымыз Алғыс хатпен марапатталды. Б.Мұратқызы
2929 рет
көрсетілді0
пікір