- Ақпарат
- 07 Желтоқсан, 2012
Сегіз қырлы, бір сырлы бойжеткендер мен бозбалалар сайысы тартымды өтті
Ө.Жолдасбеков атындағы Студенттер сарайына жастар лек-легімен ағылды. «Ана тілі» аруы» мен «Жігіт сұлтаны» – 2012» байқауының ақтық сайысына жиналған көрермендер көп-ақ. Залда ине шаншар орын болмады. Үміткерлерді қолдауға келгендер де белсенді. Әр факультет үкілеп қосып отырған әріптесін жеңіс тұғырынан көргісі келетіні анық. «Ана тілі» аруы» мен «Жігіт сұлтаны» байқауы бірнеше кезеңнен тұрады. Байқаудың негізгі мақсаты – қазіргі жастардың бойында өз ұлтына, өз Отанына деген сүйіспеншілік қасиеттерді дарытып, қазақы салт-дәстүрімізді кеңірек насихаттау. Жастардың көңілінен шығып, көрермен көзайымы болып келе жатқан бұл жолғы байқауға да әр факультеттен шешендік өнерді меңгерген, ұлттық салт-дәстүр мен әдет-ғұрыпты бойына сіңіріп өскен талантты студенттер қатысты. Алғашқы іріктеу сайысында 700-дей қыз-жігіттер бақ сынасып, екінші кезеңге олардың 90-ы ғана өткен болатын. Екінші кезеңде олар «ҚазҰУ студенті оқуға тиіс 100 кітап» жобасына қатысты. Елге танымал ақын-жазушылардың шығармаларынан үзінділер оқып, салт-дәстүрлерге байланысты сұрақтарға жауап беріп әрі өз өнерлерін көрсетті. Қыздар ұлттық тағамдар жәрмеңкесінде бақ сынады, одан түскен қаржыға қайырымдылық шаралар ұйымдастырылды. Ал жігіттер ипподромға барып ат әбзелдеріне, ат күтіміне байланысты сынақтан өтті. Сондай-ақ қол күресі, аударыспақ, т.б. ұлттық ойын түрлерінен күш-қабілеттерін байқатты. Ал ақтық сайысқа «жүзден жүйрік, мыңнан тұлпар болғандар» ғана, яғни 13 факультеттен 15 бойжеткен мен 15 бозбала жетті. Бұлардың барлығы алдындағы екі кезеңнен сүрінбей өтіп, ақтық сайысқа жолдама алған қыз-жігіттер. Олар «Сәлемдесу», «Сұрақ-жауап», «Өнер сайысы», «Сән үлгілерін көрсету» бойынша өзара сынға түсті. Байқауға қатысқан қыздар сүйкімді қылықтарымен, биязылықтарымен көзге түсіп, әдеміліктің, әдептіліктің жаршысы екендіктерін дәлелдеді. Қазақтың ұлттық киімімен сахнаға шыққан қыздар мен жігіттер нағыз қазақи болмыстарын паш етті. Өздерінің көрікті ғана емес, білімнен де қара жаяу емес екендіктерін дәлелдей білді. Байқауға қатысушылар «Өнер сайысында» шеберліктерімен көрермендерін тәнті етті. Үміткерлердің қай-қайсысы болмасын бұл сайысқа жоғары дайындықпен келгендерін аңғартты. Әннен шашу шашылып, мың бұрала билеп, халқымыздың салт-дәстүрінен шағын театрландырылған көрініс те көрсетілді. Филология, әдебиеттану және әлем тілдері факультетінің студенті Әсімхан Бекжанның орындауындағы сатирик Алпысбай Боранбаевтың «2030 жыл екен...» деген шығармасы өте сәтті шықты. Фариза Оңғарсынованың адамдық пен адалдықты жыр еткен өлеңіне қатысты монологты орындаған Әйгерім Бекмұхаметова кәсіби актерге тән шеберлік танытты. Талғат Айбосынов болса Абайдың «Айттым сәлем, Қаламқас» әнін нақышына келтіре шырқады. Айта кетуіміз керек, байқауға қатысушылар жақсы дайындықпен келген. Сол себепті де қазылар алқасына жүлдегерді анықтау оңай тимеді. «Ана тілі» газеті бас редакторының бірінші орынбасары Нұрперзент Домбай бастаған әділ қазылар шешімімен бас жүлдені филология, әдебиеттану және әлем тілдері факультетінің студенті Әйгерім Бекмұхаметова иеленіп, «Ана тілі» аруы» атанды. Әйгерімге «Ана тілі» аруы» байқауының 2011 жылғы жеңімпазы Салтанат Мәлік ару тәжін кигізді. Ал жігіттердің арасынан бас жүлдені экономика және бизнес жоғары мектебінің суденті Талғат Айбосынов еншілеп, «Жігіт сұлтаны» атанды. Мұндай шаралардың тәрбиелік, тағылымдық мәні зор. Ұлттық салт-дәстүріміз бен рухани құндылықтарымызды кеңінен насихаттап, зеректік пен шешендіктің, өнер мен өренің өлшемі болып табылатын мұндай сайыстар жиі ұйымдастырылып тұрса құба-құп. Бағдагүл Балаубаева
4032 рет
көрсетілді0
пікір