- Білім және ғылым
- 02 Маусым, 2010
Жауапкершілікті сезіне білейік
Сәрсен Жүсіпбеков, ҚазҰТУ проректоры:
Ғаламдасу заманында әлемдік талаптарға жауап беретін отандық кәсіби мамандар дайындау ісінің маңызы ара түспек. Бұл мәселе Қазақстан Президенті Нұрсұлтан Назарбаев көтерген елдің қарқынды индустриалды-инновациялық даму бағдарламасында қамтылған. Қазақстанда білікті техникалық мамандар әзірлеу қандай деңгейде? Бұл сауалға Қ.Сәтбаев атындағы Қазақ ұлттық техникалық университеті оқу істері жөніндегі проректоры Сәрсен Жүсіпбеков жауап береді. – Соңғы кездері қазақстандық жоғары оқу орындарының әлемдік университеттер рейтингінен орын ала алмай отырғандығы жөнінде сын айтылып қалады. Шын мәнісіндегі жағдай қандай? Бұл ретте еліміздегі іргелі оқу орны – ҚазҰТУ-дың мүмкіндігі жөнінде не айтар едіңіз? – Университеттің стратегиялық мақсаттары Қазақстан Президенті Нұрсұлтан Назарбаевтың Жолдауында көрсетілген талаптарды жүзеге асыруға негізделген. «Жоғары білім сапасы ең жоғары халықаралық талаптарға жауап беруі тиіс. Елдегі жоғары оқу орындары әлемнің жетекші университеттерінің рейтингіне енуге ұмтылуы керек» деген болатын Мемлекет басшысы. Осыған орай университеттің Ғылыми кеңесінде «Қ.Сәтбаев атындағы ҚазҰТУ стратегиялық дамуы» атты құжат қабылданған. 2009 жылы қаңтар айында Alatau IT City ақпараттық технологиялар паркінде өткен «Ғылым және инновация» атты көрмеде ҚазҰТУ даму бағдарламасын Елбасы толықтай мақұлдады. – Сіз айтып отырған университтетің басты құжаты не туралы? – Мақсаты – Қазақстан Президенті айтқандай, әлемнің жетекші университтері рейтингісіне кіру, әлемдік деңгейдегі ұлттық зерттеу оқу орнына айналу. – Бұл – келешек еншісінде. Ал дәл қазіргі жағдай жөнінде не айта аласыз? – Қазақстандағы техникалық жоғары оқу орындары арасында рейтингі жағынан ҚазҰТУ бірінші орын алатындығы белгілі. Ал былтыр «Times Higher QS World University Rankings» (Ұлыбритания) рейтинг агенттігі бағалаған әлем университеттері қатарына ендік. Университеттегі білім беру сапасын жақсарту үшін әлемдегі ең беделді ASIIN (Германия), ABET (АҚШ), АНОР (Ресей) сияқты аккредитация агенттіктерінде 22 білім беру бағдарламасы бойынша халықаралық аккредитациядан өту үшін қыруар жұмыс жасалуда. Мәселен, қазірдің өзінде «есептеу техникасы мен бағдарламалық қамтамасыз ету», «картография мен геодезия», «машина жасау», «электроэнергия» және «техникалық физика» тәрізді мамандар бойынша Еуропаның 16 елі мойындайтын АНОР аккредитация агенттігінен халықаралық аккредитациядан өттік. «Шеврон» компаниясы демеушілік көрсететін Халықаралық университеттердің әріптестік бағдарламасына мүше болу құрметіне ие болған посткеңестік елдердің ішінде жалғыз ҚазҰТУ ғана. – Жақсы маман әзірлеудің басты тетігі ұстаздар ұжымы екені анық. Техникалық мамандар әзірлейтін кадрлар жеткілікті ме? – Қазіргі таңда университеттегі профессор-оқытушы құрамына 3000-ға жуық қызметкер кіреді. Оның ішінде 9 ҰҒА академигі, 35 халықаралық академиялардың мүшелері, 200-ге жуық ғылым докторы, 500-ге тарта ғылым кандидаты бар. Университетте жыл сайын білікті ұстаз-ғалымдардың тәжірибесін жастарға үйрету мақсатында «Жас лекторлар мектебі» ұйымдастырылады. Өткен оқу жылынан бастап жас оқытушыларға арналған «Ұжымдық мәдениет және оқытушы әдебі» атты тренинг-курстар өткізіле бастады. Университеттің кадр потенциалын арттыру үшін «Кадр» бағдарламасы жүзеге асуда. Әрине, «бес саусақ бірдей емес». 20 мыңға жуық студенттері мен ұстаздары, қызметкерлері бар, кішігірім бір аудан халқының санына пара-пар үлкен ұжымда өзінің қасиетті борышын тиісті дәрежеде атқара алмайтын «ұстаздардың», сондай-ақ оқу үлгерімі нашар студенттердің де аракідік кездесіп қалатындығы – өмір шындығы. Сондықтан университеттің күнделікті қайнаған тіршілігінде біреу жұмыстан, біреу оқудан шығып жататыны рас. Жасыратыны жоқ, соңғы жылдары университет құрамындағы институттар қызметін өзіміз жан-жақты тексеру барысында кейбір қызметкерлердің заңға қайшы әрекеттері әшкереленді. Атап айтсақ, Мұнай және газ институтында стипендия тағайындау, диплом беруде жіберген олқылықтары үшін осы институттың басшылығы толықтай жұмыстан шығарылып, осы іске қатысты басқа қызметкерлерге қатаң сөгіс жарияланды. Бұл істердің барлығы Алматы қаласы Бостандық ауданы прокуратурасына берілді. Комиссия анықтаған кейбір фактілер бойынша прокуратура қылмыстық іс қозғаған. Университет басшылығының, Ғылыми кеңесінің алға қойған мақсаты – ұжымда мұндай келеңсіз жайттарға жол бермеу. Сондықтан алдағы уақытта да заң бұзушыларға барып, университеттің атына кір келтіретін, еліміздің болашақ тізгінін ұстар жас буынға тәлім-тәрбие беруге лайықсыз азаматтарға атағына, лауазымына қарамастан орын болмайды дегіміз келеді. Сұхбаттасқан М.ЖҮНІСОВА
2807 рет
көрсетілді34
пікір