- Қоғам
- 26 Мамыр, 2022
5 миллион гектар жер мемлекет меншігіне қайтарылады
Биыл пайдаланылмай жатқан 5 млн гектар ауыл шаруашылығы жері мемлекет меншігіне қайтарылады. Бұл туралы Ауыл шаруашылығы вице-министрі Әбілхайыр Тамабек мәлімдеді.
– Министрліктің 2021 жылғы 26 шілдедегі №223 бұйрығымен «жаппай қауіп» ұғымын айқындау жөніндегі ұсынымдар бекітілді. Ал 2022 жылғы 4 мамырдағы №139 бұйрыққа сәйкес, «жаппай қауіп» аясында жалпы алаңы 5,8 млн гектарды құрайтын 1 901 шағын кәсіпкерлік субъектісіне қатысты жоспардан тыс тексеру жүргізіліп жатыр, – деді Әбілхайыр Тамабек.
Вице-министрдің атап өтуінше, жер пайдаланушыларды экономикалық мәжбүрлеуге жағдай жасау үшін пайдаланылмайтын ауыл шаруашылығы жерлеріне салық ставкасы 10 еседен 20 есеге ұлғайтылды.
– Жоғарыда аталған шараларды ескере отырып, биыл 5 млн гектар пайдаланылмайтын ауыл шаруашылығы жерін мемлекетке қайтаруды жоспарлап отырмыз. Бұл ретте пайдаланылмайтын және заңнаманы бұзып берілген жерлерді алып қою – бір күннің жұмысы еместігін атап өтемін. Өйткені Конституцияның және Азаматтық кодекстің нормаларына сәйкес меншік құқығы қорғалған. Ал алып қою процесі тек сот арқылы жүзеге асады», – деді ол.
Әбілхайыр Тамабектің айтуынша, елімізде 29 млн гектар жер деградацияға ұшыраған.
– Бізде гидрогеологиялық мелиоративтік экспедиция бар. Бұрын олар еліміздің 4 өңірінде ғана болған еді. Биылдан бастап экспедицияның ауқымын кеңейтіп жатырмыз, барлық өңірлерде жұмыс жүреді. Олар су құрамын, жер асты суларының көтерілу деңгейін, топырақтың сортаңдануын, тұздануын анықтап, мониторинг жасайды, бағасын береді. Содан кейін уәкілетті органдарға іс-шара қабылдау үшін жібереді. Болашақта жеріне дұрыс қарамаған, тоздырып жіберген адамдарға, әкімдіктерге шара қабылдауды қарастырып отырмыз, – деді Әбілхайыр Тамабек.
Еркін ҚАЛДАН
1130 рет
көрсетілді0
пікір