• Ақпарат
• 29 Наурыз, 2012

Сот отырысы жүріп жатыр

Қазіргі күні жұртшылыққа мәлім болып отырғандай, өткен сейсенбіде Ақтау қаласында 2011 жылдың 16-17 желтоқсан күндері Жаңаөзен қаласында орын алған оқиғаға байланысты сот отырысы басталды. Сот отырысы ашық, жариялылық жағдайында өтуде. Оған қазақстандықтармен қатар шетелдік журналис­тер мен сарапшылар да қатысуда. Сот отырысы қаладағы «Арман» атты жастар орталығында өтуде. Сотқа жаппай тәртіпсіздік жасады деген айыппен 37 адам қылмыстық іске тартылған. Сот отырысына 100-ден астам жәбірленуші, 45 куәгер шақы­рылған. Мемлекеттік айыптаушылар, қорғаушылар қатысуда. Сот отырысының ашық­тығын, жариялылығын, істің өз деңгейінде қаралуын қамтама­сыз ету мақсатында қолайлы жағдай туғызылуда. Сот отыры­с­ының көпшіліктің көз алдында өтуі үшін телеэкрандар орнатылған. Бұқаралық ақпарат құралдары үшін арна­йы баспасөз орталығы жұмыс істеуде. Сот барысы жөнінде облыстық соттың ресми өкілі журналист қауымы үшін брифинг өткізіп тұрмақ. Айыпталушылар күш қол­дан­ған­дары, қоғамдық, жеке мүлікті қиратқандары, өртегені, тонаушылық және ұрлағандары үшін Қылмыстық кодекстің тиісті баптарымен айыпталуда. Солардың ішінде 30 адамға байланысты «қамауға алу» түріндегі бұлтартпау шарасы, 7 адамға «ешқайда кетпеу» шарасы қолданылған. Алғашқы күнгі сот отырысында айыпталушылардың жеке бастарына қатысты анықтамалар берілді. Сот құрамы таныстырылды, сот отырысын жүргізудегі құқықтар түсіндірілді. Мұнан соң қорғаушылар пікірлері мен талап-тілектерін білдірді. Мемлекеттік айыптаушылар өз жауаптарын келесі сот отырысында беретіндіктерін айтты. Жұртшылық елдің көз алдында өтіп жатқан сот отыры­сының әділ шешім қабыл­дайтындығына сенім білдіруде. Д.Смайыл