- Ақпарат
- 29 Наурыз, 2012
Ой бөлісіп, пікір алмасты
Алматыда Мәдениет және ақпарат министрі Дархан Мыңбай шығармашылық одақтардың басшыларымен кездесіп, шешімін күткен мәселелер төңірегінде олармен кеңінен әңгімелесті. Бұл кездесудің міндеті де, мақсаты да шығармашылық ұйымдардың Елбасымыз Н.Назарбаевтың Қазақстан халқына арнаған биылғы Жолдауындағы нұсқауларды жүзеге асыру жолдары және «мемлекетіміз бізге не береді» деп емес, «біз елімізге, халқымызға не беруге тиіспіз» деген тұрғыда алдағы кезеңдегі бағыт-бағдарды айқындап алу екенін министр әңгіме басында қадап айтты. Алайда шығармашылық одақтар басшыларының ашып айтқан ой-толғамдарында «елге біз не бере аламыз» деген мәселемен қатар, «үкімет бізге не бередіге» ойыса бергені байқалды. Мұндай пікірді мүлде жоққа шығаруға болмайтыны да айтылды. Мәселен, Жазушылар одағы басқармасының төрағасы Нұрлан Оразалин Жазушылар одағының Кеңес үкіметі кезінде құрылып, қамқорлыққа бөленгенін, соның арқасында көркем әдебиет дамып, бірегей дарындар өсіп шыққанын баса айта келіп, жазушылардың кітаптарын шығаруға, қаламақы төлеуге үкімет қамқор болуы керектігі жөнінде ұсыныстарын білдірді. Өзге одақтар басшылары да үкіметтің қамқор-көмек жасауын көбірек қозғаумен болды. Театр одағының шығармашылығы туралы сөз қозғаған Тұңғышбай Жаманқұлов қазақтың ұлттық мұң-мүддесіне орай жасалған, жасалуға тиіс қойылымдарды шет жұрттарға әйгілету мәселесін баса айтты. Әрине, қайсы одақтың басшысы болсын жаманын жасыра, жақсысын асыра айтқанымен, олардың шығармашылығының ең басты сыншысы – халық. Шет жұрттардан мақтау, марапат, сыйлық алуды мақсатқа айналдыру қазіргі шығармашылық одақтардың әдетіне айналғаны жөнінде баспасөзде аз қозғалып жүрген жоқ. Бұл ретте, әсіресе, Кинематографистер одағындағы жұмыстар сын көтермейтіндей халге ұшырағаны баршаға белгілі. Министрдің әңгіме басында ескертіп өткеніндей, «мемлекет бізге не береді» емес, «біз мемлекетке не береміз» деген талап шығармашылық одақтарды ойландыруы тиіс. Бұл ретте Елбасының қолдауымен «Мәдени мұра» аясында жарыққа шыққан туындылар бағдарға айналып, бүгінгі күн тақырыбына сай шығармалар тудыру шығармашылық одақтардың міндеті болмақ. Суретшілер одағының төрағасы Байтұрсын Өмірбековтың «конкурстар мен фестивальдер, кәсіби жарыстар, байқаулар, сараптаулар ұйымдастырылса» дегендей ұсынысы қолдауға лайық деуге болады. Бұлай дейтініміз, мұндай шаралар үкімет тарапынан қолдау табатын болса, халқымыздың талап-тілегіне сай туындылар қамқорлыққа алынып, «жүзден жүйрік, мыңнан тұлпар» шығатыны сөзсіз. Сонда ғана халқымыз мақтан етерлік, жастарымыз тәлім аларлық туындылар жасалатыны сөзсіз. Кездесу соңында министр Дархан Мыңбайдың алдағы уақытта республикалық «Ел іші – өнер кеніші» деген акция өтетінін мәлім етуінің мәні де осындай ойды меңзегендей болды. Қ.Боқаев
2533 рет
көрсетілді1
пікір