- Қоғам
- 19 Мамыр, 2010
«Ә» әрпіне әлімжеттік жасалмасын
«Хабар» телеарнасында бірнеше жылдан бері көпшілік назарына ұсынылып жүрген «Таң қалмаңыз» бағдарламасын апта сайын болмаса да ара-тұра көретінім бар еді. Бір күні хабарға қатысушылар шүлдірлеп орысша сөйлесіп жатыр екен. Хабарды жүргізуші екі жігіт қасындағы әріптесіне «Мадина, Мадина» деп әлек. Сөйтсек, қайталанбас әсем де сыңғыр дауысты, арамыздан ерте кеткен Мәдина Ералиевадан кейін экранға әнші Мадина шығатын болыпты. Тезірек басқа арнаға ауысып кеттім. Бірақ Мадина деген есім маза бермей-ақ қойды. Бағдарламаның орысша бөлімі болған соң жүргізушінің атын «а» дыбысы арқылы айтқан шығар деп, келесі бір хабарды тыңдап көрдім. Бәрібір сол Мадина.
Осы телеарнадағы «Дудар-ай» бағдарламасын үзбей және толық көремін. Жаңа жылға қарсы Арман Дүйсенов сахнаға Мәдина Сәдуақасованы шақырғанда «Таң қалмаңыздың» Мадинасы шыға келді. Әншінің «Жалын» журналының №12 санында жарияланған «Қазақстан» телеарнасындағы «Екі жұлдыз» бағдарламасы туралы пікірін оқыдым, соңында «Таң қалмаңыз» бағдарламасының жүргізушісі Мәдина Сәдуақасова деп жазылыпты. Ендеше, «Таң қалмаңыз» бағдарламасындағы екі жүргізуші жігітіміз неге қазақ қызының есімін қазақша айтпайды? Қазақтың 30-40 пайызының аты не тегі дұрыс жазылып, не дұрыс айтылмайды. Осы уақыттың ішінде қанша Мәдина, Әмина, Әлиялардың аты «а» арқылы жазылып кетті екен?! Сондықтан Мадина есімін жарнамалауды қояйық.
С.Бақтыбаев, Солтүстік Қазақстан облысы, Ақжар аудандық «Қазақ тілі» қоғамының төрағасы3167 рет
көрсетілді2
пікір