- Тіл
- 25 Ақпан, 2021
МЕМЛЕКЕТТІК ТІЛГЕ МӘН БЕРІЛДІ
Кеше Парламент Мәжілісінің жалпы отырысында «Қазақстан Республикасының кейбір заңнамалық актілеріне көрнекі ақпарат мәселелері бойынша өзгерістер мен толықтырулар енгізу туралы» Заң жобасы бірінші оқылымда мақұлданды.
Мақұлданған Заң бойынша, бұдан былай Қазақстанда ілінген жарнамаларда мемлекеттік тілдегі мәтін міндетті, яғни баннерлер, маңдайшалар, хабарландырулар, жарнама, баға көрсеткіштеріне қатысты осындай талап енгізіледі. Заң жобасы бойынша баяндама жасаған ҚР Мәдениет және спорт министрі Ақтоты Райымқұлова көрнекі ақпарат құралдары (баннерлер, маңдайшалар, хабарландырулар, жарнама, баға көрсеткіштері және т.б.) елдегі қоғамдық-саяси, әлеуметтік-экономикалық жағдайға әсер ететін маңызды құралдар екенін атап өтті.
«Құжатты бекітуден күтілетін нәтижеге тоқталсақ, мемлекеттік тілдің көрнекі ақпаратта міндетті түрде қолданылуын қамтамасыз ету, деректемелер мен көрнекі ақпарат мәтіндерін орфография нормаларына сәйкес жазуды қамтамасыз ету, мәтіндердің екі тілде теңтүпнұсқалылығын сақтап жазуды қамтамасыз ету.Заң жобасын қабылдау еліміздегі тіл саясатын тиімді іске асыруға ықпал ететін болады, теріс құқықтық және әлеуметтік-экономикалық салдарға әкеп соқтырмайды. Мемлекеттік органдарға азаматтардан көрнекі ақпаратты орналастыру кезінде Тіл туралы заңнама талаптарының бұзылуына байланысты шағымдардың көптеп түсуі орын алуда. Осы орайда мемлекеттік тілдегі көрнекі ақпараттың болмауын азаматтар Қазақстан Республикасы Конституциясының 14-бабында бекітілген өз құқықтарына қысым жасау деп санайды» деді А.Райымқұлова.
Деректемелер мен көрнекі ақпарат мәтіндерін орфография нормаларына сәйкес жазу талабы қазақ тіліндегі мәтіндердің сапасыз жазылуына, орфографиялық қателерге жол бермеуге бағытталған.
Индира СӘТІМ
2281 рет
көрсетілді1
пікір