- Тұлға
- 29 Қараша, 2012
Батамен ер көгерер...
1991 жылдың 1 желтоқсанында елімізде бүкілхалықтық президенттік сайлау өтті. Сайлау қарсаңында Республика Президенттігінен бірден-бір үміткер Нұрсұлтан Назарбаев жер-жерде болып сайлаушылармен кездескен еді. Негізі, Н.Назарбаев бұл кезде онсыз да Республика Президенті болатын. 1990 жылдың сәуірінде еліміздің Жоғарғы Кеңесі Нұрсұлтан Әбішұлын Қазақ Елінің Президенті етіп сайлады. Сонда тағы Президент сайлауын өткізу не үшін қажет болды? Себеп – Президент мәртебесінің өкілеттіктері әлі де тарлау еді. Әсіресе заң шығарушылығы жағынан басымдығы әлсіздеу болатын. Ал үлкен себеп – Президентті халық емес, Жоғарғы Кеңестің сайлауы еді. Демократия, еркіндік мықты дамып отырған елдерде ел Президентін тұтас халық сайлайды. Халық сайлаған Президентті ғана өркениетті елдер мойындайды. Ал біздер, қазақстандықтар демократия принциптерімен сол уақытта жаңа-жаңа қанығып келе жатқан болатынбыз.
Ол уақытта республикалық «Егемен Қазақстан» газетінің Жезқазған облысы бойынша меншікті тілшісіміз.Президенттікке кандидаттың еліміздің мысты аймағы саналатын Жезқазғанда да болатыны алдын ала белгілі болды. Жергілікті басылымдар 27 қарашада шыққан нөмірлерінде Н.Назарбаевтың сайлаушылармен кездесу өткізетінін халыққа жария етіп те үлгерді. Тіпті сапар бағдарламасын да жұртшылыққа хабардар етті. ...Жезқазғанның әуежайы қадірлі қонақты күтуге дайын тұрды. Әуежай ғимаратының төбесінде мемлекетіміздің жалауы желбірейді. Қазақ және орыс тілдерінде жазылған ұрандар. Қазақшасында «Нұрсұлтан! Гүлдене берсін халқың, арта берсін даңқың!» делінсе, орысшасында «Нурсултан Абишевич! Поддерживаем вашу политику согласия и мира!» делінген. Осыдан шамалы-ақ күн бұрын Қазақстанда тарихта мәңгілікке қалар ұлы оқиға болған. Қазақ ғарышкері тұңғыш рет ғарышқа ұшты. Елдің қуанышы әлі де ып-ыстық қалпында еді. Екінші ғарышкеріміз де ғарышқа ұшуға дайындалу үстінде болатын. Осыны айғақтағандай ғимарат қабырғасында Нұрсұлтан Назарбаевтың қазақ ғарышкерлері Тоқтар Әубәкіровпен және Талғат Мұсабаевпен әңгімелесіп тұрған сәті бейнеленген көлемді сурет ілінген. Қарашаның аяқ кезі ғой. Күн салқындау. Ептеп ызғар бар. Бірақ мұны елеп жатқан адам жоқ. Осы жерде жиналған үлкен де, кіші де Елбасын көруге ынтық. Оның үстіне Президент ұшағы да кешігіп жатыр. Белгіленген уақыттан екі сағат асып барады. Бір кезде Президент ұшағы да көрінді-ау. Жерге «табаны» тигеннен кейін ақырын жылжып, жиналған жұрттың тұсына тоқтады. Ұшақ сыртқы келбетімен-ақ көзге жылы ұшырады. Онда мемлекетіміздің жалауы, елтаңбасы бейнеленген. Бәрінен бұрын көңілді толқытқан көрініс – ұшақтың бауырындағы «Қазақстан» деген айшықты жазу. Өзге ұшақтардан осынысымен ерекшеленетін әуе көлігі. «Байқаңдар, Қазақстан енді бұрынғы Қазақстан емес, ол бодандықтан арылған, егемен, тәуелсіз мемлекет!» деп тұрғандай еді. Ұшақ баспалдағынан «Міне, мен де келдім» дегендей жарқын жүзді, басында қысқы бас киімі, үстінде жеңіл пальтосы бар Назарбаев түсіп келе жатты. Аспанда «Сарыарқа» күйі күмбірлеп кетті. Президентке дәм-тұз ұсынылды. Кимешек киген әжелер күмістен шашу шашты. Қызылды-жасылды киінген ұлттық-мәдени орталықтардың өкілдері өз тілдерінде тілектерін айтып жатыр. Осы кезде құндыз бөрікті, ою-өрнекті шапан киген белгілі жырау, айтыс ақыны Шынболат Ділдебаев қолындағы домбырасын қағып-қағып жіберіп, арнау-жырын төге жөнелді: Қош келдің, Жезқазғанның қаласына, Сағынған Сарыарқаның даласына. Өзіңмен бірге келсін бақыт құсы, Мыс қазған кеншілердің арасына. Ел болдық пейілі сай даласына, Тапталмай өзгелердің таласына. Аузыңнан шыққан әрбір асыл сөзің, Еліңнің ем боп жатыр даласына. Басынып бара жатқан бәзбіреулер, Түскендей болып қалды сабасына. Қаптаған Арқадағы қалың елің, Ешкімнің қалдырмайды табасына. Алғыс пен ақ батасын ел береді, Халқымның ардақ тұтқан баласына. Айтатын ел атынан аманатым, Күні бол көгінен нұр ала алатын. Қазақтың маңдайдағы бір ұлы едің, Қараңғы, қиыннан жол таба алатын. Артыңда қара ормандай халқың бар, Бел буып қайда болсын бара алатын. «Мың өліп, мың тірілген» ел едік қой, Тағдырдың тартқан талай ғаламатын. Арманың Абылайдай биік болса, Тарихты таңдандырып қалар атың. Теміртау құрышына қайнап піскен, Тілейміз Нұрсұлтанның саламатын. Халқыңның болашағы өз қолыңда, Атадан артып туған азаматым. – Паһ, шіркін! – деп өзін мақтаған ақын сөзіне жымиыс танытқан Нұрсұлтан Назарбаев рақметін айтып, микрофонға жақындады: – Қазіргідей қиын-қыстау шақта ыстық ниет білдірген сіздерге рақмет. Барлықтарыңыздың отбастарыңызға аман-саулық, халқымызға бірлік тілеймін! – деді. Бұл күні Жезқазған қаласының көшелерінде халық мол болды. Мыс шаһары бүгінгідей аса қадірменді қонақты көптен қарсы алмаған. Президент көлігі өтетін көшелерде ілінген ұрандар менмұндалап тұр. Солардың арасынан «Елін сүйген ерге сәлем!», «Елім деп соқсын жүрегің, Сарыарқа болар тірегің!» деген іспетті жазулар көзге шалынатын. Осының өзі халықтың өз перзентіне деген сүйіспеншілігі мен ықыласын аңғартқандай еді. Президент және оның жанындағы ресми адамдар мінген көліктер кеншілер елді мекені саналатын Сәтбаев қаласына жол тартты. Ат басын осы қалада орын тепкен «Жезқазғантүстіметалл» ғылыми-өндірістік бірлестігінің белгілі кәсіпорындарының бірі – Батыс Жезқазған кенішінің №55 шахта ауласына барып тіреді. Мұнда да қалың ел. Осында тек кеніш еңбеккерлері ғана емес қаланың өзге де тұрғындары жиналғаны байқалады. Осы жерде шағын басқосу өтті. Сөйлегендер Президенттіктен үміткерге сайлауда табыс тілеп жатыр. Араларында қағазға түсірген өтініш-тілектерін Елбасына ұсынып жатқандар бар. Шахта ғимаратына енген Президент кеніштің тыныс-тіршілігін танытатын әртүрлі плакаттармен, сызбалармен танысты. Кәсіпорын туралы білікті инженер, кеніш директоры Рүстем Төлебаев түсініктеме беріп жүрді. Рүстем көп сөйлемейтін, бірақ ұйымдастырушылық қабілеті мол, жан-жақты ойлайтын азамат еді. Кейін Балқаш кен-металлургия комбинатының бас директоры болды. Үкімет тарапынан ізгі ойларына қолдау таба алмаған басшы жігіт бұл қызметте көп тұрақтамады. Содан бизнес саласына кетті. Сол Рүстем Президент алдында іркілмей, кібіртіктемей кеніш жұмысы жайында қысқа да нұсқа әңгімелеп берді. Елбасы жер үстіндегі жұмыстың жай-жапсарымен танысып қана қоймай, шахтаға түсуге бел буды. Өкінішке орай, жергілікті журналистерді олай қарай жібермеді. Үстіне кеншінің жұмыс киімін, басына каскасын киген Елбасына сәттілік тілеп қала бердік. Артынан білдік, ол жер астында болып, кенші Бақберген Жанпейісов жетекшілік ететін бригада мүшелерімен кездесіп, пікір алмасыпты. Сол күні кешкілік Нұрсұлтан Әбішұлы облыстық мәдениет орталығында сайлаушылармен кездесу өткізді. Оны облыстық кеңестің төрағасы Шәріпбек Шардарбеков ашты. Бірінші болып Президенттікке кандидаттың облыстағы сенімді өкілі, кәсіподақтар федерациясы облыстық кеңесінің төрағасы Григорий Юрченко сөз алды. Осы кісі кейін Жезқазған облысының әкімі болды. Кездесуде сөз сөйлегендердің бірі бүгінгі Қазақстан Республикасы Мемлекеттік қызмет істері жөніндегі агенттік төрағасы Әлихан Бәйменов. Әлихан ол уақытта Қарағанды политехникалық институтының Жезқазғандағы филиалының доценті, облыстық кеңестің депутаты әрі облыстық «Ұлытау» қоғамдық қозғалысының төрағасы болатын. Бұл екеуінен басқа да бірнеше адамдар сөз алды. Олардың қатарында «Балқашмыс» өндірістік бірлестігінің шахташылар бригадирі М.Қасенов, «Жезқазғантүстіметалл» ҒӨБ-нің бас директоры Т.Урумов, Жезді ауылының шопаны Т.Тынымбаев, Приозерск қаласының әскери қызметшісі Ю.Герасименко, облыстың бас педиаторы Т.Закржевская болды. Бұлардың бәрі де Президенттікке үміткерді қолдады, сондай-ақ облыстағы орын алып отырған өзекті мәселелерге Президент назарын аударды. Жұрттың тағатсыздана күткені Елбасының сөзі еді. Назарбаевтың сөзге шешендігіне жиналғандар осы жолы анық көз жеткізді. Ол адамдарды өзіне баурай біледі. Олай болатын себебі: ойын ашық айтады, артық сөзге бой алдырмайды және сол мезетте адамдарды не толғандырып отырғанын дөп басады. Елдің бар зейінімен тыңдай қалатыны да осыдан. – Сіздердің алдарыңызда тұрған жаңа адам емес, – деді ол – осыдан бір жылдан астам бұрын заңды сайланған Президент. Сіздер мені жақсы білесіздер. Мен сіздерді бұған дейін жарияланғаннан басқа бағдарламамен таңғалдырғым келмейді. Менің есебімді де тыңдайтын уақыт келді деп есептеймін. Сіздердің бәріне де құқықтарыңыз бар, аманат берулеріңізге, саясатты бағалауға, Қазақстан басшылығының қызметіне бағыт берулеріңізге болады. Өз басым қазір сайлау науқанын өткізуге қолайлы уақыт деп санаймын. Мен адамдарға аспаннан құймақ жаудырам, алтын таулар орнатам, кейбіреулер айтатындай санаулы айлар ішінде жағдайды жақсартам деп айта алмаймын. Өткенге, қайта құру барысында жіберілген кемшіліктерге де тоқталғым келмейді. Қазіргідей ауыр уақытта біз бәріміз де бірге болуға тиістіміз. Бұған дейінгі қабылданған, бағдарламалар, айтылған әңгімелер де жетер. Республикада нарық экономикасына көшуде батыл қадамдар жасайтын уақыт жетті. Бұл кезең жеңіл емес. Сол себепті осы ауыр жүкті иыққа салу үшін осы бүкілхалықтық Президент сайлауын өткізу қажет. Бұдан әрі Президент республика алдындағы бірінші кезектегі міндеттерге тоқталды. Жиналғандар экономика құрылымдары қайта кұрылатынын білді. Бағаның еркін жіберілетіндігі айтылды. Мемлекет басшысы жұмыссыздық, бюджет тапшылығы пайда болатынын, кейбір әлеуметтік проблемаларды шешу уақытша тоқтатылатынын да жасырмады. Мемлекеттік мүлікті жекешелендіру басталатынын да айтты. – Нарықтық экономикаға көшу жағдайында кадрге жауапкершілік күшеюі қажет, – деді сөзінің аяғында – экономиканы ырықсыздандырып, шығынды кәсіпорындарды жауып, аппаратты қысқарту керек. Қылмысқа, жең ұшынан жалғасушылыққа қарсы күрес күшейтілуі тиіс. Алдымызда көп қиындықтар тұр. Соларды жеңе білуіміз қажет. Кездесу барысында жиналғандардың көкейлеріндегі ой-пікірлерін айтуға, Елбасына сұрақ қоюларына мүмкіндік жасалды. Назарбаев олардың бәріне де жауап берді. Кездесуге қатысушылар облыстың барлық сайлаушыларына үндеу қабылдады. Онда былай делінеді: «Біздер, Қазақ ССР Президенттігіне кандидат Н.Ә.Назарбаевпен кездесуге қатысушылар қазіргі бетбұрыс кезеңде Нұрсұлтан Әбішұлы зор беделге ие және көпұлтты Қазақстан мен бүкіл еліміз халқына танымал болғандығын шын жүректен мәлімдейміз. Қазіргі аса күрделі ішкі саяси және әлеуметтік-экономикалық жағдайда Нұрсұлтан Әбішұлы республиканың егемендігін одан әрі нығайту үшін қолдан келгеннің бәрін жасауда, экономиканың нарық қатынастарына көшуіне байланысты Казақстанды түбегейлі жаңғырту бағытын дәйектілікпен және нық ұстап келеді. Ол жүргізіп отырған саясат нәтижесінде республикамыз еліміздің неғұрлым тыныш және қалыпты аймағы болып отыр. Сайлаушылардың Жезқазған қаласында Н.Ә.Назарбаев жолдаспен кездесуі оның Қазақстанның гүлденуіне жету және республикада өмір сүретін барлық халықтардың бірлігі мен келісімін қамтамасыз ету жолындағы ұмтылысын, қажымас ерік-жігерін тағы да қуаттап берді. Кездесуге қатысушылар облыстың барлық сайлаушыларын сайлау күні Нұрсұлтан Әбішұлы Назарбаевқа бір кісідей дауыс беруге шақырады. Егеменді мемлекетіміздің Президенттігіне тек Назарбаев қана лайық деп білеміз». Үндеуде айтылғандай расында да Назарбаевтың сөзінде болашаққа деген зор сенімділік байқалатын. Жанары жарқылдап, бойындағы ерік-жігер тасқыны адамның көңілін бауратпай қоймайтын. Ол «Мені Президент етіп сайласаңдар бәрін де қатырамын» деп үйіп-төгіп уәде бермеді. Көбіне алдағы кездесер, қазіргі күні етектен тартып отырған проблемаларды тілге тиек етті. Елдегі жағдайдың күрделі екендігі оның сайлау алдындағы бағдарламасынан да айқын сезілетін. Бәрібір де көпшілік Назарбаевқа сенім білдірді. Елдің қамын ойласа, Назарбаев ойлайды деген үміт салмағы басымырақ жатты. Елі Назарбаевқа қалай сенсе ол да мысты өңірден Алматыға жақсы көңіл күйде аттанып кетті. Сайлаушылар тарапынан қолдау боларына күмәнсіз еді. Президенттің жайдары аттанғанын сол кездегі облыс басшысы Шәріпбек Шардарбеков те әуежай басында аңғартты. Ортасында сол кісі тұрған шағын топқа жақындағанымызда Шәкең жанындағы азаматтарға ризашылығын білдіріп тұр екен. – Нұрекең жақсы көңіл күйде кетті. Оның Жезқазғандағы сапарының жоғары деңгейде өтуіне сіздердің қосқан үлестеріңіз қомақты. Көп рақмет. Нұрсұлтан Әбішұлы елдің, бәріміздің сенімімізді арқалап жүрген азамат. Бұл жүктің салмағы ауыр. Халқымыздың жарқын ертеңі үшін қабырғасы қайыса еңбек етіп жүрген Елбасымыз аман болсын. Осыны тілеп жүрейік. ...Әуежайдан шығып қалаға тарттық. Айналаға ақырын-ақырын қараңғылық түсіп келеді. Төңірек тып-тыныш. Тіршіліктің қызу дүрмегі Президентпен қоса ілесіп кеткендей. Сол жылғы тұңғыш бүкілхалықтық сайлауда Нұрсұлтан Әбішұлы Қазақстан Республикасының Президенті болып сайланды. Ел тілегі ақталды. Аталардың батасы қабыл болды. Тілек те, бата да нағыз азаматқа, халық калаулысына, көпшілік құрметтісіне берілетін болса керек. Сайлау қарсаңында Президенттікке үміткерге ақ тілегі мен ақ батасын жолдаушылар көп болды. Мәселен, Сәтбаев қаласының Құрметті азаматы, ардақты ақсақал Қойшыбек Тоқтамысұлы ақ тілегін былайша жеткізіп еді: Егеменді болдық Туды жұлдызды күніміз, Шүкір, Абылайдан кейін Елім, жерім дейтін, Бар енді атақты перзентіміз. Қолбасшымыз – Президентіміз. Сенетініміз, Піріміз. Ертеңгі алдағы бағытымыз, Шығар бұл да бүгінгі біздің бақытымыз. Дегендей жалғыз ұлымыз, Баласындай көреді оны бар ұлтымыз, Жасырмаймыз, Біз қазақстандықтар: «Бәрінен де ынтымақ керек» деген. Саясатын оның жақтаймыз, Зор денсаулық, табыс тілейміз. Нұреке деп, еркелетіп мақтаймыз. Хан да, сұлтан да болмасын. Сенімін ақтап жұртының, Президенттікке қайта сайлансын, Сүйікті Нұрсұлтанымыз, – дейді халқымыз. Осыны айтып мінбеден түсе берген Қойшекеңді Нұрсұлтан Әбішұлы орнынан тұрып қарсы алып, «Рақмет, аға!» деп қарияның қолын алған. Өмірінің денін ұстаздыққа арнаған, Ұлы Отан соғысына қатысушы майдангер қарт Мырзағали Байбосынұлы да Елбасын әуежайда шығарып салып тұрып, ақ батасын берген. Кейін Мырзағали атамен болған бір кездесуде бата мәтінін дайындауда көп еңбектенгенін айтып еді. Қалай дегенмен Мемлекет басшысына бата беру жай нәрсе емес қой. Жауапкершілігі мол. Ол батада не айтылып еді? Ұзақ ойдан, терең толғаныстан туған Мырзағали атаның жүрекжарды ақ батасын көпшілікке сол күйінде ұсынғанды жөн көрдім. Биссмилаһи-р-рахмани-р-рахим! Уа, Нұрсұлтан шырағым! Қазақты бірлікке баста, Еркіндікке, елдікке баста. Үй ішінде қашанда қатарлы көптің бірі бол, Алқалы той, жиында. Алатаудай ірі бол. Әрбір ісің сәтті болсын, Қарымың қатты болсын. Қорлық көргенге қорған, сасқанға сабыр бол! Табылғанша сара жол, қиындыққа әзір бол. Үлкенге іні бол, кішіге аға бол, Барлық қазаққа пана бол! Әділетті дана бол, Төле бидей тойымды бол, Абылайдай алымды бол. Алды-артың Сарыарқадай кең болсын, Еліңнің еңсесін түзеп, қатары тек тең болсын! Сарыарқаға ерекше, Құт береке қонған жер. Қымбат кенге қойнауы, Өрісі малға толған жер. Қаз дауысты Қазыбек, Әйтеке би болған жер. Ұлылықтың белгісі, Ұлытаудың батыры, Ел қорғаған Едіге ер, Қараменде, Жидебай жатқан, Желмаясын желдіртіп, Асанқайғы топырағын басқан. Кен байлығын көрсетіп, Қаныш Сәтбай ашқан. Киелі жердің аруағы қолдасын. Қызыр баба, қырық шілтен, Пәле-жәледен қорғасын. Жаратқан тәңір жаныңа, Жолатпасын жаманат. Тағдыры барша халықтың, Бір өзіңе аманат. Аллаһу әкбар. Әмин! Сын сәт – халықтық сайлау барысында мұндай шынайы тілектер мен баталардың шарапаты тимеді деп қалай айта аларсың... ...1991 жылы 1 желтоқсанда өткен Президент сайлауы жауапты таңдау еді. Нәтижесінде осы маңызды науқанға қатысқан сайлаушылардың 98,78 пайызы Нұрсұлтан Әбішұлы Назарбаевты жақтап дауыс берді. Сөйтіп, егемен елдің Тұңғыш Президенті болып Н.Ә.Назарбаев сайланды. Одан бері де жиырма жылдан астам уақыт өтті. Көп өзгерістер, жаңалықтар болды. Қазір Ел де, Елбасы да әлемге танымал. Туған еліміз – Қазақстан талай асуларды бағындырып, өсіп-өркендеп келеді. Демек, көшбасшыны таңдауда қателік болған жоқ. Нұрперзент Домбай
8116 рет
көрсетілді0
пікір